ISE DO BORU NAMATUA DI MARGA SIMBOLON

(SILALAHI RAJA, SI GODANG ULU, MALAU, MANANG ADONG DO PE NA ASING ?)

Tabe ma di hita sude Pomparan ni Simbolontua

Jumolo ma ahu minta maaf molo hurang tangkas manang hurang toho pangantusionku taringot tu angka borunta namatua..

Adong perbedaan pandangan taringot ise BORU NAMATUA ni Simbolontua molo masa ulaon adat. Adong namandok Silalahi Raja, adong mandok Si Godang Ulu (Sihotang), adong muse do namandok Silalahi Raja dohot Malau do.

Usulhu, tapamanat ma jolo sundut ni si Raja Batak (mulai sian Tuan Sorimangaraja), asa dapot na tumingkos.

 Jadi molo nipamanat sundut ni ha”batak”on na di ginjang on, boi ma nitarik kesimpulan :

1.         Molo sinungkun pomparan ni Si Godang Ulu, godang do nasida namandok (mengakui) si Pinta Haomasan do umpompar nasida, alai pada umumna pomparan ni Naiambaton mandok muli tu Silalahi do ibotona si Pinta Haomasan i. Manang na adong do paribanni si Pinta Haomasan i na so dapot do pe di surat (ida si Boru Parmasan ?) manang tona tu pomparan ni Naiambaton ?

2.          Mangihuthon na deba didok, dua nialap ni Si Godang Ulu, i ma boru Tamba dohot boru Simbolon (marga Hasugian dohot si Lumbanbatu ma tubu ni boru Simbolon i). Alai molo pinamanat tarombo, “padaohu do sundut pangalapanna  i”. Manang na adong do ibotoni Suri Raja dohot si Martua Raja na so pala taboto do pe ? Adong do nian boru ni Suri Raja sada, i pe muli tu Malau do i. Jadi na mungkin boru ni salah satu Simbolon na ma (boru ni Nahoda Raja mamang boru ni angka anggina).

3.          Jadi mungkin boru namatua i salah satu pomparanna si Godang Ulu do, alana boru Tamba dohot boru Simbolon setingkat ni pahompu ni anak ni Si Godang Ulu na ma i (setingkat nini/nono), nunga dao sundut na di toru  (alai tahe na jolo hira sude do mungkin).

Tar i ma pangantusionhu, marsiajar-ajaran hita, molo adong  na lupa saleleng on di angka pamoruonta, hita do na hurang di si. Nilangkahon tu jolo nitailihon tu pudi, molo adong na hurang toho denggan pinauli-uli.

Sian ahu

Ompu Hasudungan Simbolon